চৰম দৰিদ্ৰতা নেওচি ছাত্ৰ আন্দোলনৰ পৰা নিৰ্বাচনী মজিয়ালৈ: এক অনুপ্ৰেৰণাদায়ক জীৱন যাত্ৰা

চৰম দৰিদ্ৰতা নেওচি ছাত্ৰ আন্দোলনৰ পৰা নিৰ্বাচনী মজিয়ালৈ: এক অনুপ্ৰেৰণাদায়ক জীৱন যাত্ৰা 

বিশেষ প্ৰতিবেদক, ঢেকীয়াজুলি

অসমৰ সামাজিক আৰু ছাত্ৰ আন্দোলনৰ ক্ষেত্ৰখনত বৰ্তমান এক চৰ্চিত নাম হৈ পৰিছে ঢেকীয়াজুলিৰ যুৱ সমাজকৰ্মী তথা বিশিষ্ট ছাত্ৰ নেতা চামচুল হক। অতি কম বয়সৰে পৰা চৰম অৰ্থনৈতিক সংকটৰ সৈতে যুঁজি, নিজে উপাৰ্জন কৰি পঢ়া-শুনা কৰা এইগৰাকী যুৱকৰ জীৱন কাহিনী যিকোনো লোকৰ বাবে অনুপ্ৰেৰণাৰ এক অনন্য উৎস। ছাত্ৰ আন্দোলনৰ মজিয়াৰ পৰা আৰম্ভ কৰি বৰ্তমান ঢেকীয়াজুলিৰ স্থানীয় ৰাজনীতি আৰু সমাজখনত এক সুকীয়া স্থান দখল কৰিবলৈ সক্ষম হোৱা চামচুল হকৰ শৈশৱৰ পৰা বৰ্তমানলৈকে থকা সুদীৰ্ঘ সংগ্ৰাম সঁচাকৈয়ে প্ৰশংসনীয়। 

কঠিন স্কুলীয়া জীৱন আৰু মহাবিদ্যালয়ৰ ৰাজনীতিত খোজ:
শোণিতপুৰ জিলাৰ ঢেকীয়াজুলি থানাৰ অন্তৰ্গত ১ নং পলাশ বস্তি গাঁৱৰ এক গ্ৰাম্য পৰিয়ালত জন্মগ্ৰহণ কৰিছিল চামচুল হকে। পিতৃ আব্দুল কাদিৰ আৰু মাতৃ জামিনা খাতুনৰ সন্তান চামচুল হকৰ স্কুলীয়া জীৱনটো আছিল অত্যন্ত কষ্টকৰ। ঘৰুৱা আৰ্থিক অনাটনৰ বাবে তেওঁ অতি কম বয়সৰে পৰা নিজে উপাৰ্জন কৰি নিজৰ পঢ়া-শুনাৰ খৰচ উলিওৱাৰ লগতে পৰিয়ালটোকো আৰ্থিকভাৱে সহায় কৰিবলগীয়া হৈছিল। 

এই চৰম কষ্টৰ মাজতো তেওঁ কেতিয়াও শিক্ষাৰ পথ এৰি দিয়া নাছিল। লোকনায়ক অমিয় কুমাৰ দাস মহাবিদ্যালয়ত উচ্চ শিক্ষা গ্ৰহণ কৰাৰ সময়তে তেওঁৰ মাজত থকা নেতৃত্বৰ গুণ ফুটি উঠে। ২০১১ চনত মহাবিদ্যালয়খনৰ ছাত্ৰ একতা সভাৰ নিৰ্বাচনত তেওঁ সহকাৰী সাধাৰণ সম্পাদক পদত বিপুল ভোটত নিৰ্বাচিত হৈছিল। ইয়াৰ উপৰি মহাবিদ্যালয়খনত 'ইছলামিক লিটাৰেৰী ছ’চাইটী'ৰ প্ৰতিষ্ঠা কালৰে পৰা জড়িত হৈ থাকি তেওঁ ২০১২-১৩ আৰু ২০১৩-১৪ বৰ্ষত ধাৰাবাহিকভাৱে দুবাৰকৈ এই ছ’চাইটীৰ সভাপতিৰ গুৰুত্বপূৰ্ণ দায়িত্ব অতি দক্ষতাৰে পালন কৰিছিল। মহাবিদ্যালয়ৰ পৰা স্নাতক ডিগ্ৰী লাভ কৰাৰ পিছত তেওঁ নিজৰ শৈক্ষিক অৰ্হতা বহু ওপৰলৈ লৈ যায়। বৰ্তমান তেওঁ কলা শাখাৰ স্নাতকোত্তৰ ডিগ্ৰীধাৰী হ’ব পৰাকৈ উচ্চ শিক্ষাত ব্ৰতী হোৱাৰ লগতে তেওঁৰ ডি.এল.এড. ডিগ্ৰী, বেংকিং খণ্ডৰ আই.আই.বি.এফ. প্ৰমাণপত্ৰ আৰু কম্পিউটাৰ বিজ্ঞানৰ পি.জি.ডি.সি.এ. ডিপ্লমা আছে। শিক্ষাৰ প্ৰতি থকা তীব্ৰ হেঁপাহৰ বাবে তেওঁ বৰ্তমান নিবেদিতা শিক্ষক প্ৰশিক্ষণ মহাবিদ্যালয়ত বি.এড. অধ্যয়ন কৰি থকাৰ লগতে এছ.পি.এম. আই.এ.এছ. একাডেমীত এ.পি.এছ.চি. অসামৰিক সেৱা পৰীক্ষাৰ বাবেও প্ৰস্তুতি চলাই আছে।

ছাত্ৰ আন্দোলনৰ সুদীৰ্ঘ সাংগঠনিক যাত্ৰা:
মাত্ৰ ১৫ বছৰ বয়সতে, যেতিয়া তেওঁ নিজে স্কুলীয়া শিক্ষা আৰু জীৱনৰ বাবে সংগ্ৰাম কৰি আছিল, তেতিয়াৰে পৰা তেওঁ সমাজৰ অনগ্ৰসৰ লোকৰ অধিকাৰৰ হকে ‘আমছু’ৰ সৈতে জড়িত হৈ পৰে। মহাবিদ্যালয়ৰ ৰাজনীতিৰ সমান্তৰালকৈ তেওঁ ২০১০ চনত পশ্চিম বৰচলা আঞ্চলিক আমছুৰ সাধাৰণ সম্পাদক আৰু ২০১৩ চনত শোণিতপুৰ জিলা আমছুৰ সম্পাদক হিচাপে নিৰ্বাচিত হয়। ২০১৭ চনৰ ১৫ জুনলৈকে তেওঁ এই জিলাখনত সংখ্যালঘু ছাত্ৰ সমাজৰ সুৰক্ষা আৰু শিক্ষাৰ অধিকাৰৰ হকে ধাৰাবাহিকভাৱে কাম কৰে। ২০১৭ চনৰ ১৫ জুন তাৰিখে তেওঁ আমছুৰ পৰা আনুষ্ঠানিকভাৱে অব্যাহতি লয়।

আমছুৰ পৰা অব্যাহতি লোৱাৰ মাত্ৰ দুমাহ পিছতে, অৰ্থাৎ ২০১৭ চনৰ ২৬ আগষ্টত তেওঁ 'মুছলিম ছাত্ৰ সন্থা অসম কেন্দ্ৰীয় সমিতি'ৰ শিক্ষা সম্পাদকৰ দায়িত্ব লয়। ইয়াৰ মাত্ৰ দুমাহমান পিছতে খাৰুপেটীয়াত অনুষ্ঠিত হোৱা কেন্দ্ৰীয় সমিতিৰ কাৰ্য্যকৰী সভাত সৰ্বসন্মতিক্ৰমে তেওঁক কেন্দ্ৰীয় সমিতিৰ শীৰ্ষ পদ "সাধাৰণ সম্পাদক"ৰ গুৰুত্বপূৰ্ণ দায়িত্ব অৰ্পণ কৰা হয়। পৰৱৰ্তী সময়ত কেন্দ্ৰীয় অধিৱেশনত তেওঁ এই দায়িত্বৰ পৰা অব্যাহতি লয়।

২০১৮ চনত উত্তৰ-পূব সংখ্যালঘু ছাত্ৰ সন্থা (নেমছু) প্ৰতিষ্ঠা হোৱাৰ দিনৰে পৰা চামচুল হক ইয়াৰ অন্যতম প্ৰধান কাণ্ডাৰী আছিল। প্ৰথমে কেন্দ্ৰীয় সম্পাদক আৰু পিছলৈ সাধাৰণ সভাৰ জৰিয়তে তেওঁ নেমছু কেন্দ্ৰীয় সমিতিৰ "সাধাৰণ সম্পাদক" হিচাপে নিৰ্বাচিত হয়। বৰ্তমানলৈকে তেওঁ এই দায়িত্বতে বাহাল থাকি সমগ্ৰ উত্তৰ-পূৰ্বাঞ্চল তথা অসমৰ সমাজ ব্যৱস্থাৰ শৈক্ষিক, সামাজিক আৰু অৰ্থনৈতিক উন্নয়নৰ হকে শক্তিশালীভাৱে কাম কৰি আছে।

তৃণমূল পৰ্যায়ত সমাজসেৱা:
বৃহৎ ছাত্ৰ আন্দোলনৰ সমান্তৰালকৈ নিজৰ জন্মভূমি ঢেকীয়াজুলিৰ শিক্ষা আৰু সামাজিক আন্তঃগাঁথনি উন্নত কৰাৰ বাবে বৰ্তমান তেওঁ কেইবাখনো গুৰুত্বপূৰ্ণ স্থানীয় অনুষ্ঠানৰ নেতৃত্ব দি সমাজসেৱا আগবঢ়াই আছে। তেওঁ স্থানীয় পলাশ বস্তি প্ৰাথমিক আৰু মাধ্যমিক বিদ্যালয়ৰ পৰিচালনা সমিতিৰ সভাপতি, ঢেকীয়াজুলিৰ অৰিয়ান্টলি হাই স্কুলৰ পৰিচালনা সমিতিৰ উপ-সভাপতি আৰু ধৰ্মীয় তথা সামাজিক সমন্বয় ৰক্ষাৰ বাবে পলাশ বস্তি চেণ্টাৰ জামে মছজিদ-মাদ্ৰাছা আৰু সমাজ উন্নয়ন সমিতিৰ সভাপতিৰ গুৰুত্বপূৰ্ণ দায়িত্ব লৈ সমাজৰ সেৱা আগবঢ়াই আছে।

যৌথ পৰিয়ালৰ মৰম আৰু নিৰ্বাচনী ৰাজনীতি:
বাহিৰৰ ইমান ব্যস্ততা আৰু সামাজিক সংগ্ৰামৰ মাজতো চামচুল হক এজন দায়িত্বশীল পাৰিবাৰিক ব্যক্তি। বৰ্তমান তেওঁ নিজৰ পত্নী চুফিয়া খাতুন, পুত্ৰ শ্বাজমান আল-খাজিনী হক, কন্যা ইন্নায়া তাবাচ্ছুম হক, পিতৃ আব্দুল কাদিৰ, মাতৃ জামিনা খাতুন, দুই দাদা চাহাবুল ইছলাম আৰু হবিব উদ্দিন তথা পৰিয়ালৰ সকলো সদস্যৰ সৈতে একেলগে অতি মিলাপ্ৰীতিৰে যৌথ পৰিয়ালত বসবাস কৰে। এই বৃহৎ পৰিয়ালটোৰ মৰম, সমৰ্থন আৰু আশীৰ্বাদেই তেওঁৰ সামাজিক কাম-কাজৰ আটাইতকৈ ডাঙৰ চালিকা শক্তি।

ছাত্ৰ আন্দোলনৰ সুদীৰ্ঘ অভিজ্ঞতা আৰু উচ্চ শিক্ষাক সম্বল কৰি চামচুল হকে ঢেকীয়াজুলি সমষ্টিৰ সৰ্বসাধাৰণ ৰাইজৰ অভাৱ-অভিযোগসমূহ বিধানসভাত ডাঙৰকৈ দাঙি ধৰাৰ বাবে নিৰ্বাচনী ৰাজনীতিত পোনপটীয়া খোজ পেলায়। বৰ্তমান ২০২৬ চনৰ অসম বিধানসভা নিৰ্বাচনত ঢেকীয়াজুলি সমষ্টিৰ পৰা এজন নিৰ্দলীয় প্ৰাৰ্থী হিচাপে তেওঁ প্ৰথমবাৰৰ বাবে প্ৰতিদ্বন্দিতা আগবঢ়াইছে। বিকল্প উন্নয়ন, শৈক্ষিক জাগৰণ আৰু জাতি-জনগোষ্ঠীৰ সমন্বয়ৰ বাৰ্তা লৈ তেওঁ এগৰাকী সক্ৰিয় যুৱ প্ৰাৰ্থী হিচাপে বৰ্তমান সমগ্ৰ সমষ্টিজুৰি ৰাইজৰ মাজত ব্যাপক তৎপৰতা চলাই গৈছে। চৰম কষ্টৰ মাজৰ পৰা ওলাই অহা চামচুল হকৰ এই সংগ্ৰামী জীৱনে বৰ্তমানৰ যুৱ প্ৰজন্মক সমাজসেৱাৰ প্ৰতি সদায় অনুপ্ৰাণিত কৰিব।