১৮ বছৰ বয়সত কোটি টকাৰ ঋণৰ বোজা, আজি ১৯ হাজাৰ কোটিৰ সাম্ৰাজ্যৰ গৰাকী: জে ৰাজমোহন পিল্লাইৰ অনুপ্ৰেৰণাদায়ক যাত্ৰা

 ১৮ বছৰ বয়সত কোটি টকাৰ ঋণৰ বোজা, আজি ১৯ হাজাৰ কোটিৰ সাম্ৰাজ্যৰ গৰাকী: জে ৰাজমোহন পিল্লাইৰ অনুপ্ৰেৰণাদায়ক যাত্ৰা

বিশেষ প্ৰতিনিধি, গুৱাহাটী: 

মানুহৰ ইচ্ছাশক্তি আৰু কঠোৰ পৰিশ্ৰমৰ আগত যে যিকোনো কঠিন প্ৰত্যাহ্বানেই হাৰ মানিবলৈ বাধ্য, তাৰ এক উৎকৃষ্ট উদাহৰণ দাঙি ধৰিছে দেশৰ অন্যতম প্ৰতিষ্ঠিত উদ্যোগী জে ৰাজমোহন পিল্লাই (J. Rajmohan Pillai) দেৱে। মাত্ৰ ১৮ বছৰ বয়সতে এক বৃহৎ অংকৰ কোটি টকীয়া ঋণৰ বোজা মূৰ পাতি লৈ ব্যৱসায়িক জগতত খোজ পেলোৱা ৰাজমোহনে আজি নিজৰ একাগ্ৰতাৰ বলত ১৯,০০০ কোটি টকাৰ এক বিশাল গোলকীয় সাম্ৰাজ্য গঢ়ি তুলিবলৈ সক্ষম হৈছে। তেওঁৰ এই অভূতপূৰ্ব যাত্ৰাই বৰ্তমান সমগ্ৰ দেশৰে যুৱ প্ৰজন্ম তথা নৱ-প্ৰজন্মৰ উদ্যোগীসকলৰ বাবে এক নতুন আশাৰ সঞ্চাৰ কৰিছে।

কেনেকৈ আৰম্ভ হৈছিল এই সংগ্ৰাম?
কেৰালাৰ এক ঐতিহ্যমণ্ডিত ব্যৱসায়ী পৰিয়ালত জন্মগ্ৰহণ কৰা ৰাজমোহন পিল্লাইৰ জীৱনৰ মোৰ সলনি হৈছিল হঠাতে। মাত্ৰ ১৮ বছৰ বয়সতে পিতৃৰ আকস্মিক বিয়োগৰ পিছত সমগ্ৰ পৰিয়াল তথা ব্যৱসায়িক দায়িত্ব তেওঁৰ কান্ধত পৰে। কিন্তু পিতৃৰ মৃত্যুৰ পিছতহে তেওঁ জানিব পাৰিছিল এক ভয়ংকৰ সত্য। তেওঁলোকৰ কোম্পানীটো সেই সময়ত কোটি কোটি টকাৰ ঋণৰ বোজাত পোত খাই আছিল। চাৰিওফালৰ পৰা বেংক, বিত্তীয় প্ৰতিষ্ঠান আৰু পাওনাদাৰৰ তীব্ৰ মানসিক তথা আইনী হেঁচাই তেওঁক জুৰুলা কৰি পেলাইছিল।     

পৰাজয় স্বীকাৰ নকৰি মুখামুখি হ’ল প্ৰত্যাহ্বানৰ:

সাধাৰণতে তেনে এটা স্পৰ্শকাতৰ বয়সত যিকোনো ব্যক্তিয়েই ভাগি পৰাটো স্বাভাৱিক আছিল, কিন্তু ৰাজমোহনে হাৰ মনা নাছিল। চকুপানী মচি তেওঁ ধৈৰ্য্যৰে পৰিস্থিতিৰ মুখামুখি হ’ল। তেওঁ আটাইকেইটা বেংক আৰু পাওনাদাৰৰ সৈতে পোনপটীয়াকৈ আলোচনা কৰি কিছু সময় বিচাৰিলে আৰু দিন-ৰাতি একাকাৰ কৰি ব্যৱসায়িক সাম্ৰাজ্যখনক পুনৰুদ্ধাৰ কৰাৰ কামত ব্ৰতী হ’ল।

কৰ্পোৰেট জগতত নতুন ধাৰাৰ সৃষ্টি:        1
পুৰণি আৰু পৰম্পৰাগত ব্যৱসায়িক পদ্ধতিক সম্পূৰ্ণ সলনি কৰি তেওঁ আধুনিক তথা বহুজাতিক বিপণন কৌশল অৱলম্বন কৰিলে। তেওঁৰ তীক্ষ্ণ ব্যৱসায়িক বুদ্ধি আৰু দক্ষ নেতৃত্বৰ ফলত তেওঁলোকৰ ফ্ল্যাগশ্বিপ কোম্পানী ‘বিটা গ্ৰুপ’ (Beta Group) আৰু কাজু বাদামৰ আন্তঃৰাষ্ট্ৰীয় ব্যৱসায়ে অভূতপূৰ্ব সফলতা লাভ কৰিবলৈ ধৰে। তেওঁৰ এই সফল ব্যৱসায়িক মডেলৰ বাবেই পৰৱৰ্তী সময়ত তেওঁ কৰ্পোৰেট জগতত "কেশ্বু কিং" (Cashew King) অৰ্থাৎ কাজু বাদামৰ সম্ৰাট হিচাপে পৰিচিত হৈ পৰে।

ঋণমুক্ত হৈ গঢ়িলে ১৯ হাজাৰ কোটিৰ সাম্ৰাজ্য:
কঠোৰ পৰিশ্ৰম আৰু সততাৰ ফলত ৰাজমোহনে কেৱল পিতৃদত্ত আটাইবোৰ ঋণেই সূত-মূলসহ পৰিশোধ কৰাই নহয়, বৰঞ্চ নিজৰ ব্যৱসায়িক সাম্ৰাজ্যখনক বিশ্বৰ মানচিত্ৰত এক বিশেষ স্থানত প্ৰতিষ্ঠা কৰিলে। বৰ্তমান সমগ্ৰ বিশ্বতে বিস্তৃত হৈ থকা তেওঁৰ ব্যৱসায়িক সাম্ৰাজ্যৰ সম্পত্তিৰ নেটৱৰ্থ প্ৰায় ১৯,০০০ কোটি টকা বুলি হিচাপ কৰা হৈছে।

১৮ বছৰ বয়সত শূন্য আৰু ঋণাত্মক অৱস্থাৰ পৰা আৰম্ভ কৰি আজি ১৯ হাজাৰ কোটিৰ গৰাকী হোৱা জে ৰাজমোহন পিল্লাইৰ এই জীৱন যাত্ৰাই প্ৰমাণ কৰে যে— "পৰিস্থিতি যিয়েই নহওক কিয়, আত্মবিশ্বাস আৰু লক্ষ্য স্থিৰ থাকিলে সফলতা নিশ্চিত।