কাইলৈ সমগ্ৰ দেশজুৰি পৱিত্ৰ ৰাখীবন্ধন উৎসৱ: উখল-মাখল ৰাজ্যৰ বজাৰ

 কাইলৈ সমগ্ৰ দেশজুৰি পৱিত্ৰ ৰাখীবন্ধন উৎসৱ: উখল-মাখল ৰাজ্যৰ বজাৰ

বিশেষ প্ৰতিবেদন, ২৭ আগষ্ট:
কাইলৈ সমগ্ৰ দেশৰ লগতে অসমতো উলহ-মালহেৰে পালন কৰা হ’ব পৱিত্ৰ ৰাখীবন্ধন উৎসৱ। শাওন মাহৰ পূৰ্ণিমা তিথিত উদযাপিত হ’বলগীয়া এই উৎসৱক লৈ ইতিমধ্যে ৰাজ্যজুৰি এক উখল-মাখল পৰিৱেশে বিৰাজ কৰিছে। এই পৱিত্ৰ দিনটোত ভগ্নীসকলে নিজৰ ককাইদেউ বা ভাইটিৰ দীৰ্ঘায়ু, সুখ আৰু মংগল কামনা কৰি সোঁহাতৰ মণিত ৰাখী বান্ধি দিব। বিনিময়ত ভাতৃসকলেও ভগ্নীক আজীৱন সুৰক্ষা আৰু ছাঁৰ দৰে কাষত থকাৰ দৃঢ় সংকল্প ল’ব।

পৌৰাণিক কালৰে পৰা চলি অহা এই উৎসৱৰ এক বিশেষ ধৰ্মীয় আৰু ঐতিহাসিক গুৰুত্ব আছে। ভগৱান শ্ৰীকৃষ্ণ আৰু দ্ৰৌপদীৰ পৱিত্ৰ সম্পৰ্ক, দেৱী লক্ষ্মী আৰু ৰজা বলিৰ কাহিনী অথবা বুৰঞ্জীৰ পাতত লিপিবদ্ধ ৰাণী কৰ্ণৱতী আৰু সম্ৰাট হুমায়ুনৰ ভাতৃত্ববোধৰ আদৰ্শই এই উৎসৱক শতিকাজুৰি জীয়াই ৰাখিছে। বৰ্তমান যুগতো ইয়াৰ সামাজিক প্ৰাসংগিকতা সমানেই অটুট আছে।

কেৱল পৰিয়ালৰ মাজতে আবদ্ধ নাথাকি এই উৎসৱে বৰ্তমান এক সাৰ্বজনীন ৰূপ ধাৰণ কৰিছে। সমাজৰ বিভিন্ন প্ৰান্তত একতা আৰু সম্প্ৰীতি বৰ্তাই ৰাখিবলৈ জাতি-বৰ্ণ-ধৰ্ম নিৰ্বিশেষে লোকসকলে কাইলৈ ইজনে সিজনক ৰাখী বান্ধি ভাতৃত্ববোধৰ বাৰ্তা প্ৰেৰণ কৰিব। আনকি দেশৰ সীমান্তত কৰ্তব্যৰত জোৱানসকল আৰু সমাজৰ সুৰক্ষাত নিয়োজিত আৰক্ষী প্ৰশাসনকো বিভিন্ন দল-সংগঠনে ৰাখী বান্ধি কৃতজ্ঞতা জ্ঞাপন কৰাৰ কাৰ্যসূচী গ্ৰহণ কৰিছে 

উল্লেখ্য যে, জ্যোতিষশাস্ত্ৰ অনুসৰি কাইলৈ অৰ্থাৎ ২৮ আগষ্ট শুকুৰবাৰে ৰাখী বান্ধাৰ আটাইতকৈ পৱিত্ৰ তথা শুভ ক্ষণ হৈছে পুৱা ০৫:৪১ বজাৰ পৰা ০৯:১৮ বজালৈ। উৎসৱৰ পূৰ্বে আজি ৰাজ্যৰ বজাৰসমূহত বিভিন্ন ৰঙীন ৰাখী আৰু মিঠাই ক্ৰয় কৰিবলৈ গ্ৰাহকৰ অভূতপূৰ্ব ভিৰ পৰিলক্ষিত হৈছে। আধুনিকতাৰ ধামখুমিয়াতো ৰাখীবন্ধনৰ দৰে পৱিত্ৰ উৎসৱে আমাৰ সমাজ ব্যৱস্থাক একতাৰ ডোলেৰে বান্ধি ৰাখিব বুলি সচেতন মহলে আশা প্ৰকাশ কৰিছে।

---