আইন সঁচাকৈয়ে সকলোৰে বাবে সমাননে? ১৭ বাৰকৈ পেৰ’ল লাভ কৰি পুনৰ কাৰাগাৰৰ পৰা ওলাই আহিল ৰাম ৰহিম

 আইন সঁচাকৈয়ে সকলোৰে বাবে সমাননে? ১৭ বাৰকৈ পেৰ’ল লাভ কৰি পুনৰ কাৰাগাৰৰ পৰা ওলাই আহিল ৰাম ৰহিম

বিশেষ প্ৰতিবেদন, ২৬ আগষ্ট:
আমাৰ দেশৰ আইন ব্যৱস্থা সকলোৰে বাবে সমান বুলি কোৱা হয়। কিন্তু শেহতীয়াকৈ পোহৰলৈ অহা এটা ঘটনাই সমগ্ৰ দেশজুৰি পুনৰ এক ডাঙৰ প্ৰশ্নবোধক চিহ্নৰ সৃষ্টি কৰিছে। ধৰ্ষণ আৰু হত্যাৰ দৰে গুৰুতৰ গোচৰত দোষী সাব্যস্ত হৈ কাৰাগাৰত বন্দী হৈ থকা ডেকামুখী বাবা গুৰমীত ৰাম ৰহিম সিং পুনৰবাৰ জেলৰ পৰা মুক্ত হৈ ওলাই আহিছে। হাৰিয়ানা চৰকাৰে ৰাখী পূৰ্ণিমাৰ উপহাৰ হিচাপে এইবাৰ তেওঁক ২১ দিনৰ পেৰ’ল (Parole) মঞ্জুৰ কৰিছে। ইয়াকে লৈ এতিয়া তীব্ৰ প্ৰতিক্ৰিয়া প্ৰকাশ কৰিছে দেশৰ বিশিষ্ট সাংবাদিক ৰাজদীপ সৰদেশাইয়ে।

সাধাৰণতে এজন অপৰাধীয়ে কাৰাগাৰৰ পৰা পেৰ’ল লাভ কৰিবলৈ বহু আইনী প্ৰক্ৰিয়াৰ মাজেৰে যাবলগীয়া হয়। বহু ক্ষেত্ৰত জৰুৰী কাৰণ নহ’লে পেৰ’ল লাভ কৰাটো অসম্ভৱ হৈ পৰে। কিন্তু ডেকামুখী বাবা ৰাম ৰহিমৰ ক্ষেত্ৰত যেন আইনৰ নিয়মবোৰ অলপ বেলেগ। জানিব পৰা মতে, বৰ্তমানলৈকে তেওঁক ১৭ বাৰকৈ এনেদৰে পেৰ’লত মুক্তি দিয়া হৈছে। হাৰিয়ানাৰ ৰোহটকৰ সুনৰিয়া জেলৰ পৰা ২১ দিনৰ বাবে মুক্তি পোৱাৰ পিছতেই এক বিশাল কনভয়ৰ মাজত তেওঁ নিজৰ আশ্ৰমলৈ যাত্ৰা আৰম্ভ কৰে। এই দৃশ্যই এতিয়া সচেতন মহলৰ চকু কপালত তুলিছে। 

ৰাম ৰহিমৰ এই বাৰে বাৰে পোৱা মুক্তিক লৈ দেশৰ অন্যতম জ্যেষ্ঠ তথা বিশিষ্ট সাংবাদিক ৰাজদীপ সৰদেশাইয়ে তীব্ৰ ক্ষোভ উজাৰিছে। তেওঁ প্ৰশ্ন উত্থাপন কৰি কৈছে যে, "সঁচাকৈয়ে আইন সকলোৰে বাবে সমাননে?" সাধাৰণ কয়দীসকলে নিজৰ অধিকাৰ সাব্যস্ত কৰিবলৈ বছৰ বছৰ ধৰি সংগ্ৰাম কৰিবলগীয়া হোৱাৰ সময়ত, এগৰাকী ধৰ্ষণৰ গোচৰত অভিযুক্তই কেনেকৈ চৰকাৰৰ আশীৰ্বাদত বাৰে বাৰে মুকলি আকাশৰ তললৈ অহাৰ সুযোগ পায়? নে ইয়াৰ আঁৰত লুকাই আছে কোনো বিশেষ ৰাজনৈতিক সমীকৰণ?

হাৰিয়ানা চৰকাৰৰ এই সিদ্ধান্তক লৈ এতিয়া সামাজিক মাধ্যমত সমালোচনাৰ ধুমুহা বলিছে। একাংশ লোকে ক্ষোভেৰে কৈছে যে ভোট বেংকৰ ৰাজনীতিৰ বাবেই চৰকাৰে এগৰাকী ধৰ্ষণকাৰীক বাৰে বাৰে ৰাষ্ট্ৰীয় উপহাৰ প্ৰদান কৰি (ৰাখী পূৰ্ণিমাৰ উপহাৰ হিচাপে) আহিছে। ১৭ বাৰকৈ পেৰ’ল লাভ কৰা এই ঘটনাই আমাৰ ন্যায়িক ব্যৱস্থা আৰু চৰকাৰী নীতিৰ ওপৰত এক ডাঙৰ প্ৰশ্ন এৰি থৈ গৈছে। অৱশ্যে এই সমগ্ৰ বিষয়টোক লৈ চৰকাৰী পক্ষৰ পৰা কোনো ধৰণৰ স্পষ্টীকৰণ এতিয়ালৈকে পোৱা হোৱা নাই।